'Backpacking' in die Sederberg

Donderdag 11 Maart het ‘n groep opgewonde Gr. 7’s van Laerskool Koo, hul ouers en onderwysers, vertrek na die Sederberge. Na net meer as drie uur se ry was ons in die berge by die Algeria kampterrein, een van die gewildste plekke in die Sederberge. Die bosboustasie en kampterrein lê aan die bopunt van ‘n lieflike vallei, aan die oewer van die Rondegatrivier waar almal toe ook die middag gaan swem het.

Die volgende oggend het ons almal, gewapen met ons rugsakke, die Sneeuberg staproete aangepak. Die eerste ent van Eikeboom tot by die Sneeuberghuis (net ‘n kliphuisie sonder beddens) is nie te moeilik nie en het so drie ure geduur. Die rotsformasies is buitengewoon mooi. By die Sneeuberghut het ons ons swaar rugsakke gelos na ‘n middagete en toe die tog aangepak na die Maltese kruis. Sommige brawes onder ons wou Sneeuberg uitstap, maar toe Sneeuberg (2027m en twee maal hoër as Tafelberg) voor ons pryk, het hulle darem vinnig daarteen besluit.

Die aand was nou die ideale geleentheid om ‘n lekker praatjie met die Gr. 7’s te hê oor die opdraandes wat hulle nog in die lewe gaan ondervind en dat mens net moet vasbyt en deurdruk.

Dag twee het ons een van die mooiste roetes in die Sederberge gestap. Die roete deur die pragtige Duiwelsgat sal mens nie maklik vergeet nie en is nie baie moeilik nie.

Die aand het ons by die Sanddrif kampterrein oornag (skaduryke kampplek, 20 staanplekke met krag). Ons het die aand ‘n baie interessante lesing by die sterrewag daar in die berge bygewoon. Die volgende oggend sou ons die Wolfberg skeure aanpak, maar almal was maar redelik lyfseer en het ons toe die 35 minute stap na Maalgat aangepak, ‘n reuse swemgat in die rivier. Groepsdruk het meegebring dat mense met selfs hoogtevrees van die 11 meter hoë kranse en hoër afgespring het in die diep swemgat. Daarna het ons ‘n heerlike “brunch” geniet en het almal die terugtog huis toe aangepak.

Have your say

Back to Contents Page